អាជ្ញាធររារាំងមិនឲ្យបញ្ចាំងខ្សែ ភាពយន្តរឿងសម្លាប់ ជា វិជ្ជា
ដោយ ឡេង ម៉ាលី
2010-05-02
ការប៉ុនប៉ងបញ្ចាំងខ្សែវីដេអូ រឿង "តើនរណាជាអ្នកសម្លាប់ ជា វិជ្ជា" របស់សហភាពសហជីពកម្ពុជា នៅព្រលប់ថ្ងៃទី១ ឧសភា ត្រូវអាជ្ញាធររាជធានីភ្នំពេញហាមមិនឱ្យបញ្ចាំងទេ បន្ទាប់ពីសម្ភារៈសម្រាប់បញ្ចាំងត្រូវអាជ្ញាធរនគរបាលដកហូត។
ការប៉ុនប៉ងបញ្ចាំងខ្សែវីដេអូ របស់សហភាពសហជីពកម្ពុជា រឿង "តើ នរណាជាអ្នកសម្លាប់ ជា វិជ្ជា" មិនបានសម្រេចទេ ពីព្រោះការប៉ុនប៉ងនេះ ត្រូវអាជ្ញាធរក្រុងភ្នំពេញរារាំង និងដកហូតយកសំពត់សសម្រាប់បញ្ចាំង កាលពីព្រលប់ថ្ងៃទី១ ឧសភា ឆ្នាំ២០១០។
អភិបាលរងខណ្ឌចំការមន លោក ជរ គឹមស៊ បានប្រាប់ហេតុផល ក្នុងការរារាំង ដល់ក្រុមសហភាពសហជីពកម្ពុជាថា ព្រោះតែការបញ្ចាំងវីដេអូនេះ មិនមានការអនុញ្ញាតពីសាលាក្រុងភ្នំពេញ ហើយលោកថ្លែងបន្តថា ៖ «មាន លិខិតអនុញ្ញាត លោកអាចធ្វើបាន។ បើសិនជាមិនមានលិខិតអនុញ្ញាត ខាងយើងខ្ញុំមិនអនុញ្ញាតជូនទេ។ លោកអ្នកសារព័ត៌មានឃើញស្រាប់ហើយ តើចរាចរណ៍នៅទីនេះយ៉ាងម៉េច? បើសិនជាលោកមានលិខិតអនុញ្ញាត យើងខ្ញុំអនុញ្ញាតជូន បើសិនជាមិនមាន យើងខ្ញុំមិនបានអនុញ្ញាតជូនទេ»។
លោក ជរ គឹមស៊ មានប្រសាសន៍ថា ប្រសិនបើមានលិខិតអនុញ្ញាត លោកនឹងជួយក្នុងការកកស្ទះចរាចរណ៍។
ប្រធានសហភាពសហជីពកម្ពុជា លោក រ៉ុង ឈុន ថ្លែងថា ការដាក់បញ្ចាំងខ្សែវីដេអូ រឿង "តើនរណាជាអ្នកសម្លាប់ ជា វិជ្ជា" នេះ លោកបានជូនដំណឹង និងជួបប្រជុំនៅសាលាក្រុងភ្នំពេញហើយ ក៏ប៉ុន្តែ សាលាក្រុងបានបដិសេធការអនុញ្ញាត។ លោកថ្លែងថា លោកមានការសោកស្ដាយ នៅពេលដែលមានការរារាំងពីនគរបាល និងអាជ្ញាធរខណ្ឌចំការមនដូច្នេះ។
ទោះជាយ៉ាងនេះក្ដី លោក រ៉ុង ឈុន បានទទូចសុំឱ្យអាជ្ញាធរផ្ដល់កន្លែង ដើម្បីបានបញ្ចាំងវីដេអូ រឿង "តើ នរណាជាអ្នកសម្លាប់ ជា វិជ្ជា" នេះ ពីព្រោះលោកចង់ឱ្យសាធារណជន បានទស្សនាខ្សែវីដេអូនេះ ដោយលើកហេតុផលថា ៖ «ការបញ្ចាំងវីដេអូ នេះ វាជាភស្តុតាងមួយ សម្រាប់អាជ្ញាធរទៅធ្វើការស្វែងរកចាប់ឃាតកពិត ហើយជាការព្រមានទៅដល់ឃាតក ឈប់ប្រព្រឹត្តនូវអំពើឃាតកម្ម មកលើមេដឹកនាំសហជីព មេដឹកនាំនយោបាយ លើអ្នកសារព័ត៌មាន ក៏ដូចជាសិល្បការិនី»។
ទាក់ទងនឹងការរារាំងរបស់អាជ្ញាធរក្រុងភ្នំពេញ ក្នុងការមិនឱ្យបញ្ចាំងខ្សែវីដេអូនេះ តំណាងរាស្ត្រគណបក្សសមរង្ស៊ី លោក ថាច់ សេដ្ឋា មានប្រសាសន៍ថា រដ្ឋាភិបាលមិនត្រូវមានវិធានការហាមឃាត់ ហើយមិនគួរខ្លាចការពិតទេ ៖ «បើសិនណាហាមឃាត់ បានន័យថា រដ្ឋាភិបាលអត់ទទួលស្គាល់ការពិត គេចពីការពិត ហើយអាចនៅពីក្រោយការកាប់សម្លាប់ ពីព្រោះការឈឺចាប់របស់គ្រួសារ របស់កម្មករ ឈឺចាប់ណាស់ ។ បើសិនជាយើងរកមិនឃើញ គួរតែឱ្យដឹងរឿងហ្នឹងផង តើវាដល់ណា៎អីដល់ណា»។
អ្នកតំណាងរាស្ត្រគណបក្សសមរង្ស៊ី មួយរូបទៀត លោកស្រី មូរ សុខហួរ បានថ្លែងថា វីដេអូឯកសារ "តើនរណាជាអ្នកសម្លាប់ ជា វិជ្ជា" នេះ ត្រូវគេបញ្ចាំងនៅប្រទេសដទៃមួយចំនួនហើយ ដូចជាសហរដ្ឋអាមេរិកជាដើម ហើយខ្លឹមសារសំខាន់នៅក្នុងវីដេអូ គឺមានចម្លើយសាក្សី ដែលបានឃើញឃាតកម្មលើរូបលោក ជា វិជ្ជា កាលពីឆ្នាំ២០០៤ នោះ។
លោកស្រីមានប្រសាសន៍បន្ថែមថា ៖ «ប្រសិនបើរដ្ឋាភិបាលយើង មានឆន្ទៈពិតប្រាកដ ដើម្បីយកភស្តុតាងទាំងអស់នេះ មានបងស្រីម្ចាស់តូប មានអ្នកសាក្សីជាច្រើនទៀត យកចម្លើយទាំងអស់នេះ យកមកផ្គុំគ្នា ឃាតកយើងដឹងៗ ច្បាស់ណាស់ ហើយឃាតកនោះមិនមែនឃាតក ដែលសម្លាប់នោះជាឃាតកពិតប្រាកដទេ។ យើងចង់ឱ្យអ្នកណាបញ្ជាពិតប្រាកដ»។
បើទោះជាដូច្នេះក្ដី មន្ត្រីសហភាពសហជីពកម្ពុជា និងអ្នកតំណាងរាស្ត្រគណបក្សសមរង្ស៊ី បានបោះបង់ចោលការប៉ុនប៉ងបញ្ចាំងវីដេអូនេះ បន្ទាប់ពីអាជ្ញាធរព្យាយាមរឹបអូសយកក្រណាត់សំពត់ស សម្រាប់បញ្ចាំងជាលើកទីពីរ។ ពលរដ្ឋម្នាក់បាននិយាយថា បើទោះជាអាជ្ញាធរកម្ពុជា បានរារាំងការដាក់បញ្ចាំងជាសាធារណៈដូច្នេះក្ដី ក៏គាត់អាចទស្សនាវីដេអូ រឿង "តើនរណាជាអ្នកសម្លាប់ ជា វិជ្ជា" នៅក្នុងទំព័រវ៉ឹបសៃថ៍បានដែរ៕
No comments:
Post a Comment