ប្រមុខរដ្ឋាភិបាលអ៊ីតាលីព្រមព្រៀងគ្នាលែងលះជាមួយភរិយា
Share
Diggdel.icio.usGoogleStumble UponFacebookRedditTwitterText Size
NormalLargeExtra Large(ប្រុសកោះ)
ថ្ងៃ ពុធ ទី ១២ ខែ ឧសភា ឆ្នាំ ២០១០
រូបថត បរទេស
លោកនាយករដ្ឋមន្រ្តីអ៊ីតាលី និងភរិយា
ទស្សនាវដ្ដី TIMES រាយការណ៍កាលពីថ្ងៃទី១០ ឧសភា កន្លងមកនេះថា ក្រោយការរៀបការនឹងគ្នាបាន២០ឆ្នាំ និងការរស់នៅបែកគ្នាអស់ពេល១ឆ្នាំ និងការចរចាគ្នាអស់ពេល៦ខែ ប្រមុខរដ្ឋាភិបាលអ៊ីតាលី លោកស៊ីលវីយ៉ូ ប័រលូស្កូនី និងភរិយាទី២របស់ លោកអតីតតារាលោកស្រីវ៉ើរ៉ូនីកា ឡារីយ៉ូ បានឈានដល់ការព្រមព្រៀងគ្នាជាគោលការណ៍អំពីការលែងលះឱ្យដាច់ស្រេចហើយ។
ទោះបីជាភាពលំអិតនៃកិច្ចព្រមព្រៀងនេះពុំត្រូវបានលាតត្រដាងក៏ដោយ ក៏លោកស្រីវ៉ើរ៉ូនីកា អាចរក្សាជាម្ចាស់កម្មសិទ្ធិនៃភូមិគ្រឹះ VILLA BELVEDERE ស្ថិតនៅក្រុង MACHERIO ជិតទីក្រុងមីឡាន ដែលមានតំលៃប្រមាណជា៨០លានអឺរ៉ូ ។ ក្រៅពី ចំណែកភូមិគ្រឹះនេះ លោកស្រីបានស្នើការចេញប្រាក់សំរាប់អាហារូបត្ថម្ភចំនួនប្រមាណជា៣,៥លានអឺរ៉ូ ក្នុងមួយខែ ដែលមានខ្ពស់ជាងសំណើរបស់លោកប័រលូស្កូនី អាយុ៧៣ឆ្នាំ ដែលយល់ព្រមផ្ដល់ឱ្យអាហារូបត្ថម្ភនេះត្រឹម៣០០.០០០អឺរ៉ូ ក្នុងមួយខែ ។ អ្នកទាំង២បានជួបគ្នារយៈពេលជិត៥ម៉ោង ក្នុងតុលាការក្រុងមីឡាន ហើយលទ្ធផលដែលសំរេចបានគួរឱ្យពេញចិត្ដ ។ ពេលឈ្លោះគ្នា លោកស្រីឡារីយ៉ូ បានថ្កោលទោសលោកប័រលូស្កូនី ដោយប្រកាសថា លោកប័រលូស្កូនី ពុំមែនជា ស្វាមីល្អ ហើយល្មោភសិច ។ ក៏ប៉ុន្ដែលោកប័រលូស្កូនី បានបដិសេធថា លោកពុំមានទំនាក់ទំនងសិចជាមួយនារីមិនទាន់ពេញវ័យឡើយ ។ ចំណែកលោកប័រលូស្កូនីវិញ អះអាងថា ភរិយារបស់លោកក៏មិនស្មោះត្រង់ដែរ ដោយមានទំនាក់ទំនងស្នេហាជាមួយអង្គរក្ស ។
លោកប័រលូស្កូនី និងលោកស្រីឡារីយ៉ូ បានស្រលាញ់គ្នាកាលពី៣០ឆ្នាំមុនហើយ មានកូនជាមួយគ្នាម្នាក់មុនពេលលោកប័រលូ ស្កូនី លែងលះជាមួយភរិយាទីមួយ លោកស្រី CARLA DELL’ OGLIO ។ ទ្រព្យសម្បត្ដិផ្ទាល់របស់លោកប័រលូស្កូនី មានប្រមាណជា៥ពាន់លានអឺរ៉ូទៅ៨ពាន់លានអឺរ៉ូ ។ លោក មានកូន២នាក់ជាមួយភរិយាទីមួយ ។ លោកប័រលូស្កូនី និងលោកស្រីឡារីយ៉ូ មានកូនជាមួយគ្នា៣នាក់ ៕
No comments:
Post a Comment